Tusk

“Why don’t you tell me what’s going on?”

                Ċerti episodji are meant to happen. Bħal meta bil-karozza ma tgħaddix mit-triq tas-soltu u tispiċċa tindaħan jew tlaqqat multa għal alla u għall-erwieħ. Bħal meta d-darba li tilbes qmis ċara għid li twaqqa’ fuqek iz-zalza qisek paċoċċu u jkollok toqgħod bit-tbajja’ ġurnata sħiħa.

              Għalhekk meta ftit ilu, waqt li kont għaddej mill-Imsida u bl-iskuża li ħassejt griżmejja nexfin waqaft quddiem l-ewwel bar li nzertajt miftuħ – not my usual haunt imma intrigani xorta waħda għax fakkarni f’bar li kien iħobb ix-xiħ – u mbagħad ġara dak li ġara, ftakart mill-ġdid x’kienu jgħidu missirijietna: għall-magħmul m’hemmx kunsill. Għax għalkemm mas-snin għaddejt miljun darba minn quddiem il-Coach & Horses Pub, qatt qabel ma rfist mill-għatba ‘l ġewwa. Stħajjiltni f’wieħed minn dawk il-barijiet li faqqsu fit-Tmeninijiet ġewwa Buġibba u ma żammewx il-pass maż-żminijiet għax lill-Ingliżi hekk kienu jogħġbuhom.

              Qaħba mġiddma bagħla, dawk il-flixken stivati puliti jsejħuli wieħed wieħed b’ismi.

 Anyway: poġġejt mal-bar u tlabt whisky tripplu, dak tal-flixkun aħdar biex niftiehmu, lill-barman ġolf iżda mid-dehra minn tagħna ħafna, jekk mhux iżżejjed.

             “Silġ u ilma?”

             “Le, waħdu.”

          Il-parruċċani, dak il-ħin tas-sebgħa, stajt tgħoddhom fuq id waħda kollha mitlufa f’dinjiethom. Madwar dawk l-imwejjed tondi tal-injam stħajjilthom gżejjer maqtugħa fl-oċean tal-inkwiet individwali. Mal-bar ma kien hemm ħadd ħliefi. Alleluja. Wara ġurnata xogħol m’hemm xejn isbaħ minn grokk fis-santa fucking paċi. Fuq board iswed ċkejken imdendel f’tarf il-bar kien hemm imħabbar illi iktar tard kien ħa jkun hemm band lokali, bl-isem propizju ta’ Brodu, iddoqq live.

            Fuq it-televixin kienet għaddejja xandira live tal-wasla ta’ Matteo Renzi, dak li għall-Ingliż jinqala’ daqskemm jinqalgħu l-Maltin għall-football, għas-summit ta’ Stokkolma li matulu (bħal dejjem) jingħad ħafna u ma jsir qatt xejn.               

Mill-wifi tal-bar qbadt nara x’ikkummentawli taħt l-aħħar bloggata li tellajt. Smajt lill-barman jirraġuna ma’ xi ħadd fuq mejda żewġ passi ‘l bogħod iżda qajla tajt kas ta’ x’kien qed jingħad. Qtajtha konversazzjoni bejn tnejn li ilhom jafu lil xulxin.

          “Nitħassru Madonna,” qalli l-barman malli tibiegħed “sieħbu” għalkemm suppost il-qagħda tiegħi kienet ċara biżżejjed: mgħandix aptit paroli, sieħbi.

             “Min hu?” saqsejtu kurjuż xorta waħda kif flejt dahar il-figura tixxengel, qisha pendlu t’arloġġ tal-lira, fi triqitha lejn il-loki. Kienu l-passi (ċari daqs il-kristall) ta’ persuna vittma tal-vizzju tax-xorb minn x’ħin jisbaħ sa ma jidlam. Kont nafha sew dik it-tip ta’ mixja. Trabbejt magħha, tista’ tgħid.

             “Duminku s-Surġent,” qalli b’nofs tbissima.

         Duminku? Kollega? Nistqarr li qas kelli ħjiel min kien u wisq anqas smajt b’aħbaru. Staqsejt lill-barman kienx fil-Korp.

          “Insomma kien xi darba sa ma kellu jirriżenja għall-għarrieda,” żied jgħidli sabiex ikun preċiż. “Almenu hekk nismagħhom jgħidu.”

Minn ilbiesu u mill-qagħda aktar kellu xeħta ta’ vagabond milli wieħed illi fl-imgħoddi kien involut fiż-żamma tal-ordni. Iżda fil-ftit mumenti t’osservazzjoni tiegħi, bil-ħarba qabel għeb ġewwa l-loki, diversi ħjiel oħra bdew jikkonfermawli li l-barman ma kienx giddieb.

          Għajnejja kixfuni mal-barman li ridt nixrob mhux biss grokk tripplu ieħor iżda wkoll aktar informazzjoni dwar dak il-persunaġġ partikolari.

           “Dejjem jiġri u jagħqad mat-toroq tal-Imsida, jgħidu, u anke Birkirkara rawh insomma. Ġieli qbadtu rieqed fil-karozza żmagata ‘l għandu, Beetle safra tagħmel xeba’ ħsejjes u duħħan.”

            “Taf fejn kien stazzjonat?” saqsejtu, f’salt wieħed maħkum minn kurżitá kbira.

            “Mela ħsibtni d-DOI?” kompla l-ġolf bid-daħqa.

            Kxift il-karti u għedtlu min jien. Baqa’ jitbissem daqslikieku ma sema’ xejn ġdid.

         “Dejjem bla sold fuqu u jitkarrab għad-drinks iżda dejjem isib min iħallaslu xi wieħed jew tnejn. Xortieh tajba. Għax x’nagħmel?  Inkeċċih ‘il barra? Taparsi niktibhomlu fuq il-ktieb u nibqa’ ma narax 1c kemm indum ħaj?”

          Waqa’ silenzju skomdu bejnietna sakemm tfaċċa’ mill-ġdid Duminku jaqfel iż-żipp tal-jeans wiesa’ jidħlu fih żewġt irġiel: bniedem traskurat b’leħja ilha ma tara xafra naqra mhux ħażin, liebes qmis tal-flannella bil-kaxxi ħomor u griżi moda fis-seklu l-ieħor, subgħajn safranija nkallati minn ħafna tipjip ta’ sigarri,  ħarsa malinkonika iżda tbissima permanenti ta’ min ħabbat wiċċu ma’ ħafna mewġ u tgħallem jaqdef kontro-kurrent.

           “X’ħa tieħu Duminku?” offrejtlu jien u nistiednu jpoġġi ħdejja.

           Ma qalx le għall-ebda waħda, anzi għajnejh leħħew mal-istedina għad-drink. Għall-isbaħ siegħa u nofs li kien imiss – sadanittant laħqu bdew jaslu l-membri tal-Brodu jarmaw għas-sessjoni, jikkurdaw l-istrumenti, jintonaw il-kanzunetti tas-set – Duminku ma tħarrikx minn ħdejja jibdel miegħi rakkonti minn ħajtu kkulurita. Sakemm ħbattna mas-sikka li mmarkat ix-xiżma f’ħajtu. Dik li biddlitu fi bniedem ieħor.

        Dominic Buttiġieġ, Karkariż ta’ 39 sena, kien Surġent b’ambizzjonijiet li javvanza fil-karriera u bil-ħolma li xi darba jispiċċa fit-Taqsima ta’ Kontra d-Droga, hu li tilef lil ħuh b’overdose snin qabel meta kien għadu adoloxxenti, fejn ħass li seta’ jkun tassew effettiv fil-ġlieda.

            “Imbagħad sentejn ilu daħlet Pamela fix-xena u kollox tar mar-riħ.”

          Pamela kienet mara single minn Fleur-de-Lys, iżgħar minnu, li ltaqa’ magħha online fuq Facebook waqt li Duminku kien miżżewweġ ma’ Tuneżina minn Sousse b’tifel ta’ sitt snin. Bagħtitlu friend request u żiedha bla ma jafha minn Adam. Darba jirċievi mingħandha: Hello! Kif int? Kelma ġġib l-oħra, bħalma jiġri ta’ spiss f’ċirkostanzi bħal dawn, u f’kemm ilni ngħidlek spiċċaw jiċ-chat-jaw kull ħin u kull mument. Tilef għaqlu warajha. Litteralment. Il-mobile kien jieħdu miegħu kullimien, anke kif jidħol jieħu shower. Għax ovvjament ma kienx daqshekk iblah li jħallih fejn ġie ġie. Wara kollox Fatima kienet qisha seqer u xejn ma kien jaħarbilha.

           F’temp ta’ xahar, irrakkuntali bl-akbar onestá ta’ min mit-tiġrib ħasad faċċata ġdida, ħajtu bdiet iddur biss madwar Pamela. Ittraskura lil martu, it-tifel u l-familtu. Ix-xogħol biss żammu milli jegħreq għal kollox. Xtaq li jiltaqgħu u jagħmlu dak li kien ilu ma jagħmel ma’ martu. Iżda kienet ittennielu li kien għadu kmieni wisq. Kollox f’ħinu u f’waqtu, kienet tgħidlu. Biddlu bejniethom in-numri tal-mobile u kemm –il darba bagħtu messaġġi lil xulxin bla fruntieri ta’ ħinijiet u postijiet. Sa wasal jagħtieha l-indirizz tiegħu u talabha tagħha u mhux darba jew tnejn waqt li suppost xogħol għadda minn fejn kienet toqgħod forsi ma jafx kif jilmaħha.

Sakemm darba waħda, wara konversazzjoni sħuna iżjed mill-pastizzi tas-Serkin, talbitu prova li kien tassew iridha:

            “Ibgħatli ritratt tiegħek għarwien ħuta għax qanqaltni u għadek qas taf kemm nixtieq li qiegħda ħdejk, imbagħad nibgħatlek tiegħi ħalli żżommu u tiftakar fija ...”

           Bingo. Duminku bla ma ħasibha darbtejn (u qas tlieta minn kliemu) għamel kif qaltlu. U x-xilep ġewwa. Ma jgħaddux ħames minuti fejn jirċievi telefonata minn numru mhux reġistrat fejn leħen maskili ordnalu jħallsu elfejn ewro jekk ma riedx li r-ritratt jintbagħat lil martu (bil-konversazzjoni b’kollox) kif ukoll imperreċ fuq kull sit soċjali li ħalaq Alla.

             Minn dakinhar ħajtu spiċċat. Malli ħallas l-elfejn mhux talli ma għaddewlux ir-ritratt iżda talli talbuh elfejn ewro oħra. Baqgħu jixorbulu demmu sakemm demm iżjed ma kellux: martu saret taf xorta waħda u qabdet lil binha u telqet bih lura Sousse; id-dar ħadielhom il-bank għax ma setax ilaħħaq mal-loans, fuq ix-xogħol sar erratiku immensament u tilef kull interess fil-karriera u fl-ambizzjoni għalhekk tefa’ r-riżenja.

              “U la kont fuq in-naħa tal-liġi għalfejn bqajt daqshekk passiv?” saqsejtu jien.

            “Ħassejtni hopeless case, ma tafx kif jiġrilek kultant,” offrieli hu b’leħen miksur kif xorob l-aħħar grokk whisky.

            Għalkemm ir-rakkont ma qalli xejn ġdid li widnejja mhux diġa’ semgħu qabel, ħassejt demmi jsir ilma. Kif kien wasal il-ħin biex jerħilha lura lejn il-Beetle offrejtlu biss bi tbissima:

             “Ma taħsibx li wasal iż-żmien li nreddgħuhulhom kif inhu sewwa u xieraq?”

Private Eyes

“They see your every move.”

Kif jgħidu: meta tiġi iftħilha. Għax ġeneralment tidħol qisha debba u għandha ħabta titlaq b’pass ta’ nemla, ħaqq ta’ Kana. Is-soltu l-influwenza tgħaddi darba f’mitt qamar qisha biex tkun għamlet present biss u ma tkagħbarnix bosta. Iżda mhux din id-darba.

Riedet tpattihieli bi kbir.

Il-ġimgħa l-oħra, wara ġurnata xogħol tal-beatipawli, bdejt inħoss griżmejja jtektku fil-bogħod. Xejn ta’ barra minn hawn għal min bħali jpejjep ħafna u maħkum mill-vizzju li jixrob il-kiesaħ anke fl-eqqel tax-xitwa. Għalhekk ferrajt tliet grokkijiet whisky ma’ mug misħun, mgħarfa ġulepp tal-ħarrub u nofs lumija. Sakemm weġibt in-nofs tużżana emails tas-soltu niżżiltu ma’ tnejn neurofen.

Biex ma ntawwalx: l-għada filgħodu, maż-żerniq, qomt mitħun. Daqslikieku romblu tat-tarmak fettillu jgħaddi minn fuqi u baqa’ wieqaf ipparkjat fuq l-istonku tiegħi. Griżmejja kienu ħuġġieġa u belgħa ilma niżlet passjoni. U għax il-borma fuq tlieta toqgħod, ħaffirt trinka ġej u sejjer il-loki b’uġigħ ta’ żaqq minn dawk il-kbar.

Hawn irridek, qalli. Iż-żobb ħej x’għaxqa.

F’dik il-kundizzjoni ma kienx lok li mmur għax-xogħol, wisq anqas li nirriskja ninqabad fit-traffiku – the order of the day f’dan il-pajjiż misħut – għax żgur il-Madonna li kien itini estru mill-kbar nett. Intfajt fis-sodda sagħtejn oħra u malli saru s-sebgħa ċempilt lil Casaletto nagħtih il-bxara t-tajba (għalih).

“Meta dieħel?” saqsieni.

“Skont il-kundanna tat-tabib,” serraħtlu rasu. Ma kellux għalfejn ikun jaf li t-tobba u jien ma konniex ħbieb. Is-sigaretti u l-alkoħol bastano e avanzano bħala drogi. 

Madwari l-ħajja ta’ kuljum baqgħet għaddejja a la l-bubun li Victor Gallo kien qed iħoss il-pieni tal-infern u jinsab f’xifer breakdown tal-Madonna. Ilbist track suit ħafifa u ntfajt nissendika lill-ġirien bit-tama (qawwija) li nsib xi ħaġa t’interess. Stħajjiltni l-James Stewart tal-okkażjoni. 

-          Deirdre, ta’ faċċata, kienet qisha xebgħet minn ħajjitha hija u tixxabbat mat-tieqa sabiex iġġibha tleqq avolja dakinhar kienet imbassra x-xita.

-          Felix tal-istationery, żewġ bibien ‘il fuq mill-blokka tiegħi, kien fuq l-għatba jgħid iċ-ċajt doppju sens lil żewġt ixjuħ żmagati daqsu jidħqu qishom fucking fidili.  

-          Maggie (jew Thatcher għal dawk li bħali ma tantx inniżżluha, għax qisha ras il-ġarretta) kienet ġejja tkaxkar il-bixkilla warajha mingħand l-Old Trafford u tgerger waħedha. Probabbilment kontra Ġowżef Muscat u l-Lejber.

-          Sandi, l-Ungeriża tat-tieni sular fil-blokka opposta għal tagħna, kellha l-purtieri miftuħa beraħ u mitlufa fl-eżerċizzji tal-aerobics tagħti wirja spettakolari ta’ sormha jiċċaqlaq b’ritmu stil duwa tal-Madalena.

Sakemm f’salt wieħed ħarsti waqgħet fuq żewġt irġiel iħufu fuq wieħed mill-bjut tal-akkwati. Ma ridtx tkun Poirot biex tintebaħ li kienu qed jaġixxu b’mod suspettuż u xejn naturali. Ħaddiema żguralla ma kinux għalkemm min forsi ma tantx jagħti kas seta’ jaħsibhom hekk minħabba l-haversacks wara daharhom. Imnejn kienu ma setgħux jintebħu bija imma jien kelli vantage point fuqhom għax stajt nosservahom bla ebda diffikultá. Kienu qed jitkellmu b’mod aġitat, almenu hekk dehrli, ma’ xi terza persuna fuq il-mobile waqt li jittawlu għal ġot-triq li b’xorti ħażina mill-gallarija tiegħi ma kinitx tidher.

Dal-aħħar sena u nofs Tas-Sliema kienet vittma ta’ mewġa impressjonanti ta’ żgassi minn kriminali organizzati, bħall-gang tal-Ġeorġjani u l-bqija, fejn kienu qed jagħmlu ħerba u jisirqu kull ma jgħodd għal idejhom. Kienu esperti u jafu x’għandhom jagħmlu. Lil ommi kont xbajt intambrilha ma tafda lil ħadd li ma tafx.

Mara rqajqa, qisha maħkuma mis-seba’ snin tal-għaks, fetħet il-bieb tal-bejt u għamlitilhom sinjal sabiex isegwuha. Telqu jiġru għal warajha bħal għefieret. Is-sitwazzjoni kienet ċara. Ma kienx hemm fejn tintilef u kien hemm wisq anqas ħin x’taħli. Minkejja d-deni u l-uġigħ qbadt l-arma, deffistha fiċ-ċinta tal-qalziet u tlaqt niġri b’saqajja ma’ dahri lejn il-binja in kwistjoni. Infurmajt lid-Depot b’li kien għaddej u dawn min-naħa tagħhom għaddew l-info lill-RIU li nzerta kellhom karozza għaddejja b’ronda fiż-żona.

Il-bieb ta’ barra kien magħluq għalhekk bdejt indoqq il-qniepen tal-appartamenti kollha daqslikieku kienu kordi ta’ pjanu sakemm jiftaħli xi appostlu mbierek.

“What’s going on?” staqsieni xi ħadd jittawwal minn ġo tieqa.

“Open the fucking door, Madam. Police!” ħanxart jien.

Fetħitli bil-ġiri. Il-lift kien fuq nett f’għoxx oħtu. Għalhekk bdejt tiela’ t-taraġ tlieta tlieta. L-istorbju, l-għajjat u l-kommozzjoni kienu ċari. Xi ħaġa gravi kienet għaddejja fil-ħames sular. L-ilħna kienu taħlita ta’ Malti, Ingliż u Slav.

Sadanittant il-ħoss tas-sireni beda dejjem joqrob aktar. Kont deċiżissimu li naqbadhom fil-fatt lil dawn il-qatta’ sangisugi li jridu jaqilgħu lira billi jieħdu dak li ħaddieħor jaqla’ bl-għaraq ta’ xbinu. Żomm il-kontroll, Gallo. X’żomm il-Madonna!

Kif nasal fl-indana ta’ qabel il-ħames sular nilmaħ grupp ta’ nies miġbura fil-bieb ta’ barra ta’ appartament numru disgħa. Għoddejt erbgħa imma fil-foga tal-mument taf kienu nqas u taf aktar. Ma bqajtx nara. Ħriġt il-pistola minn ħżiemi minkejja li kont konxju li ma kinitx ikkargata.

“Ara ma jiċċaqlaqx xi ħadd minnkom!”

Iżda malli rawni nipponta l-pistola qam pandemonju sħiħ. Telqu dak kollu li kellhom f’idejhom u ħarbu jiġru lura lejn il-bejt. Stħajjilthom ġenwimanent ippanikkjati u anke xi ftit mbeżża’ wkoll. Min jidgħi bil-Malti, min x’aktarx jagħmel l-istess bl-Islav.

Dal-Eastern Europeans ma fihomx ħobż.

Ġietni forza barranija u qbadt insegwiehom daqslikieku kont Michael Johnson fit-tellieqa ta’ ħajtu. Imma balleċ dawn l-alla ħallelin kienu ħfief għax bdew jaqbżu minn bejt għall-ieħor qisu xejn mhu xejn.

Imma kif jgħidu: nothing lasts forever. Lanqas il-bjut. Xi darba kellhom jieqfu għax ħa jiġu daharhom mal-ħajt.

“You bunch of fucking losers, stay where you are!”

Hekk f’dik id-dagħdigħa, stil Popeye Doyle fil-French Connection, il-ħallelin tassew ħasbu li waslet siegħethom.

“Perfect! Cut!” werżaq xi ħadd minn warajja.

Indur, u apparti lil tal-RIU li ma dehrux wisq kuntenti b’dik ix-xena, biex niftehmu, nosserva crew televiżiv imdaqqas kollha wiċċhom għad-dawl.

Apparentament l-Ispettur Victor Gallo, dakinhar fuq sick leave, kien ta kontribut enormi f’xena kruċjali ta’ episodju importanti ta’ serje popolari – minn dawk li jibdew fil-Ħarifa u jibqgħu sejrin ad aeternum, iddur madwar l-intriċċi ta’ grupp kriminali li ħadd ma jista’ jsib tarf – sabiex tieħu laqta ferm aktar realistika. U kieku kelli l-ħin x’naħli u kont wieħed minn dawk li nħobb nara l-istazzjonijiet lokali żgur Alla li kont nagħrafhom l-atturi Maltin.

Tlaqt lura d-dar nidgħi u nisħet kemm is-siegħa kif ukoll il-mument li rġajt twebbilt li nagħmilha tal-hero. Meta ħa nitgħallem?