The River

“Now these memories come back to haunt me, they haunt me like a curse.”

Ħa nagħmilha ċara mill-ewwel: miniex wieħed minn dawk li nħobb niddiletta bit-tiġijiet jew li nattendi għalihom bi ħġari bħallikieku huma l-highlight tal-ġimgħa (jew tax-xahar jew tas-sena u via dicendo). Nippreferi l-kumpanija tal-flixkun milli tan-nies. Għax kemm ħa ddum tredden soċjevolment ma’ nies illi kieku kien mod ieħor tibgħathom jieħdu? Għax saħħa jkun tal-familja, fejn trid jew ma tridx xi kultant iġibuk dahrek mal-ħajt, fejn f’ċirkostanzi hekk tkun qed tgħum f’baħar familjari. Imma meta fil-letterbox insib xi nvit (in gergo ċitazzjoni għall-għarrieda), mingħand xi “kollega” jew xi ħabib antik għax ħa jiżżewwġulu t-tifel jew it-tifla, nieħu qatgħa f’imsarni.

Mhux għar-rigal, qabel xi ħadd jazzarda jsejjaħli Scrooge. Il-flus dejjem ġew u marru. Għall-intrigu aktar minn kollox.

Qed nistħajjilkom tgħiduli: mhux ma tmurx jew? Għamiltha ħafna drabi, serrħu raskom, għax wara kollox min hu sidi? Iżda xi drabi għall-magħmul m’hemmx kunsill. Għax xi kultant aħjar daqsxejn diplomazija milli l-alabiebiżmu li jiġini naturali.

Kien ilu jċaqċaq imma tibqa’ tittama sal-aħħar li b’xi mod jinsewk. Sakemm ftaħt l-envelopp u sibt l-istedina għas-Sur Gallo & guest. Bint l-Assistent Kummissarju. Kif tista’ ma tattendix? U kif l-oħrajn qabduha fl-uffiċċju li jekk ma mmurx inkun tan-nejk ejwann, ma kienx beħsiebni noħroġ ta’ mażetta.

Żewġ Sibtijiet ta’ wara wasal dan l-imbierek fucking tieġ u oħroġ il-għaġeb ħarġet waħda minn dawk il-ġranet fejn tixtieq tkun kullimkien, l-aktar ħdejn il-baħar, milli f’xi sala qisek tiġieġa f’gallinar. L-oħrajn ipproponew car pooling bil-kundizzjoni li ma nsuqx jien għaliex kienu jafuni biżżejjed. Għaldaqstant f’karozza waħda: jien, Casaletto, it-tfajla u żewġ kollegi oħra, Spetturi ilni nafhom is-snin.

Erħejtilha lejn il-post favorit tiegħi, il-bar, deċiż li minn hemm ma jċaqlaqni ħadd ħlief l-ispirtu. Sibt rokna fejn it-trassis ma kienx popolari u bdejt inlegleg fl-ifjen whisky tal-okkażjoni. Mela ntiehom tmenin ewro rigal ta’ xejn jew? Il-band qabdet iddoqq diski popolari. Madwari lmaħt uċuh familjari li ma naqsux milli jsaqsuni dwar xogħli bħallikieku tassew jimpurtahom. Kien hemm diversi nisa li ħarsuli b’xewqa ripressa waqt li għaddew labranzetta ma’ żwieġhom – jew kien l-effett tal-alkoħol? Trays għaddejjin darba f’mitt qamar, imwejjed tal-ikel skarsi daqs l-ilma fl-Afrika, cocktail bar miżgħud il-ħin kollu bil-mistiedna u li ma setax jonqos li ntih titwila wkoll. Ngħid id-dritt kont qed nieħu gost ħafna aktar milli stennejt. Casaletto u l-bqija, mixħutin bilqiegħda fuq is-siġġijiet qishom qatta’ xjuħ, kienu qed jieħdu a good time huma wkoll mid-dehra.

Qabadni ġuħ kelb.

Sakemm ...

Sakemm f’salt wieħed għajnejja marru fuq wieħed mill-mistiedna, taħt il-gazebo maġenb pixxina enormi, u l-aħħar grokk ħassejtu nieżel velenu. Kif ma kontx ntbaħt bih qabel? Kemm kien għadda żmien? Għaraftu minnufih u qbadtu jħares lejja tabirruħu li mhux. Qabbadt sigarett. Ma qgħadtx naħsibha bosta. Jekk ma taqbadx il-barri minn qrunu tispiċċa b’ħafna rimorsi u minn dawk kelli biżżejjed, anzi żżejjed. Kien mal-mara/partner/whatever qisha statwa tal-irħam u mid-dehra ma tifhimx akka bil-Malti.

“Jimmy Cardona?”

 “Nafek?”

“Nbdilt daqshekk?”

U għajnejh tradewh.

“Victor Gallo?”

“Kollu kemm hu.”

Tbissimtlu, tfajt il-bqija tas-sigarett fit-tazza vodka li kellu f’idu taħt il-ħarsa mhux sorpriża tal-istatwa u tlaqt lura mnejn ġejt. Kont naf li ħa jifhem għala. U aktar minn hekk kont ċert illi mhux ħa jirreaġixxi bil-guffaġni tas-soltu ħlief li jsofri dik l-umiljazzjoni fil-kwiet.

Żmien ilu Jimmy Cardona kien wieħed minn dawk il-bouncers impjegati, mal-ħafna nightclubs, fuq il-bażi li huma ex-pulizija allura bilfors li tajbin f’xogħolhom. U xi wħud minnhom kellhom ħabta jaħsbu li għalihom kienet tapplika biss il-liġi tal-ġungla. Paceville kien mimli sa ruħ ommu, bħal dejjem. Jien, Mariella (dak iż-żmien konna diġà koppja fissa) u l-bqija tal-gaj tagħna l-Footloose.  Quddiemna ringiela shooters u flixken tax-xorb. Żmien ieħor fejn ix-xorb kien azzjoni kollettiva u mhux eżistenza individwali. Taf int meta tkun qed tieħu gost il-ħmerijiet huma riċetta ewlenija. Min jitnejjek bl-ilbies t’oħrajn, min jitfa’ xi ħarsa twila żżejjed lejn xi tfajla ta’ ħaddieħor, min jifflertja b’riżultati effiċjenti jew diżastrużi (jiddependi mill-approach), round wara ieħor u l-mużika tirbombja f’widnejna daqslikieku kienet xi ħaġa normali.

Sakemm ...

Minn warajna jitfaċċaw tliet bulldozers – l-aktar meta tqis li aħna konna għadna żgħażagħ ta’ dsatax u bl-ebda inklinazzjoni lejn ġlied jew vjolenza – jagħmlu l-arja magħna li wieħed mill-grupp tagħna kien offendiehom talli ġibdulu l-attenzjoni li kien qed jagħti fastidju lil xi tfajliet barranin. Minnufih fhimt li f’moħħhom kellhom ħaġa waħda: jagħmlu show bina. Ippruvajt inkellimhom bil-kelma t-tajba u nispjegalhom li Johnny kien magħna l-ħin kollu u kien biss każ ta’ identità żbaljata. Iżda minn widna daħal u mill-oħra sparat ħareġ. Qabdu fina donnhom l-ifferuċjati biex jixħtuna ‘l barra u waqt dan kollu jien kien aktar fi ħsiebi li ma tweġġax Mariella. Daqqiet, tixjir bil-ponn, dagħa, imbuttar u f’kemm trodd salib sibna ruħna fuq il-bankina quddiem il-ħars kurjuż ta’ ġemgħa li semgħet l-istorbju, avolja kienet ħaġa spissa dawk iż-żminijiet. Imma barra ma kien hemm l-ebda sinjal ta’ Mariella. Fejn kienet? Ħassejni konfuż u beżgħan, sakemm wieħed minn sħabi nfurmani li kienu żammewha ġewwa flimkien mat-tfajla t’ieħor. Nofs siegħa wara ħarġu jibku u jirrakkuntawlna li bl-iskuża li kellhom suspett li fil-handbags kellhom il-joints – skuża banali li kienet taħdem ħafna f’dik l-epoka – spiċċaw ibagħbsu fihom u jittrattawhom b’mod indiċenti. U kont ċert li Jimmy Cardona kien il-perċimes. Għax kien magħruf għal dawn l-affarijiet u l-kelma f’Paceville kellha ħabta tiġri iżjed min-normal. Għamilna rapport l-Għassa, interrogawhom u investigawhom madankollu fejn konna bqajna.

Mariella damet żmien ma tridx tirfes f’nightclub ieħor u ma kontx intieha tort.

Għadda ż-żmien u fittixtu u saqsejt għalih iżda kienu qaluli li mar jaħdem barra fuq xi rig taż-żejt l-Iskozja.

Iżda jekk hemm ħaġa li ma nagħmilx hija li ma ninsiex. Qatt.

Heroes

“We are nothing, and nothing will help us.”

Kont ilni ma nikteb kelmtejn għomor. Mhux għax ma ridtx imma dax-xahrejn ix-xogħol ħadli moħħi, ħini u saħħti. U ma’ kemm xorti ħa taqbad tlaħħaq? Iżda dil-ġimgħa seħħet ġrajja stramba oħra u għalhekk sibt ruħi ntektek dawn l-erba’ kelmiet fuq il-keyboard mimlija ġmar. Anzi, stajt niktibhom.

            Il-Ħadd li għadda fettilli nqum kmieni, jew aħjar dak il-mingħul ta’ tifel li joqgħod fil-flat ta’ ħdejja qam qisu l-indumunjat u miegħu qajjem blokka sħiħa għandikun, u tistgħu timmaġinaw x’nervi ta’ bagħal kelli. Il-Ħadd fucking imqaddes. Għalhekk ma nafx x’fettilli, flok bqajt nitgħażżen fis-sodda nkompli naqra r-rumanz giallo, qbadt il-karozza u rħejtielha lejn ir-Rabat. Għal darba t-toroq baħħ, xi ġmiel.

Il-famuż Crystal Palace kien imballat bin-nies, bħas-soltu. Riħa taqsamlek qalbek u ġġiblek l-istonku għoqda. B’miraklu denju ta’ San Ġennaru rnexxieli nilmaħ post battal, ma’ sorm il-bar, fejn b’xi mod stajt nixrob il-kafe’ fit-tazza, bħal dari, u nibla’ t-tliet pastizzi (tnejn rikotta u wieħed piżelli) fuq plattina. Madwari xjuħ bakkru kmieni għall-quddies jew żgħażagħ ġejjin imċemplin wara lejl tbahrid. Taħlita mżewqa u kuntrast ħelu.

Anke jekk ma ridtx, spiċċajt naqsam il-qari tal-ġurnali tal-Ħadd ma’ ta’ ħdejja li donnu ma tantx beda jsibha bi tqila jagħmel running commentary, b’vuċi għolja, tal-aħbarijiet ewlenin tal-ġurnata ta’ qabel. Kien wieħed minn dawk id-defsiet li jaħsbu li jifhmu f’kollox.
“Ma jistax ikun jibqgħu deħlin dal-glandestini kollha,” għajjat l-espert, jferfer idejh, biex jisimgħu kulħadd daqslikieku ħassu xi Napuljun.

            “Qatt ma rajniek ‘l hawn,” qalli x-xwejjaħ ta’ faċċata tiegħi, jqabbad il-pipa, qisu nduna li kont qed niekol ilsieni.

            “Jaqaw għandek bżonn membership card biex tiġi l-Ħdud filgħodu?” saqsejtu bi tbissima.

            Kont qisni kellimtu bil-Ġappuniż u l-bqija tal-ħanut infaqa’ f’daħqa ġenerali.

            Spiċċajt qattajt siegħa fosthom u għal darba ma ddispjaċieni xejn li kont f’post mifqugħ bin-nies. Kif ħriġt minn hemm sibt li kienu t-tmienja u nofs daqqu. Irħejtilha bil-pass mat-toroq dojoq tar-Rabat la t-temp inzerta sabiħ. Kont ilni daqsxejn indur u nagħqad, mingħajr ma nagħti kas minn fejn għaddej, meta nisma’ lil xi ħadd jgħajjatli. Jew almenu hekk dehrli. Ħarist madwari imma ma kienx hemm ruħ oħra għaddejja, ħliefi. mitluf fi ħsibijieti.

            “Mister! Mister! Tista’ tgħinni jekk jogħġbok?”

            Bqajt inħares lejha – mara qabżet is-sittin fiċ-ċert iżda għadha żżommha daqslikieku iżgħar u eleganti ħafna f’ilbiesha mingħajr ma tkasbar id-dinjità tagħha – għaliex jien u miexi ma kontx intbaħt biha sserraħ mal-grada ta’ quddiem il-bieb tistenna xi ruħ tajba tgħaddi.

            “Skont xiex,” għedtilha.

            “Ġinġer tiegħi ma jistax jinżel minn fuq is-siġra u tgħidx x’inewwaħ miskin u sarli l-ħin għall-quddies,” qaltli hi b’ċertu paniku.

            “Ġinġer?”

            “Il-qattus tiegħi,” spjegatli mill-ġdid. “Milux ħafna għandi iżda nħobbu daqs il-mimmi t‘għajnejja.”

            Sibt ruħi fil-ġnien daqs dinja tas-Sinjura Yvette Formosa, skontha armla indipendenti ħafna, nipprova nniżżel dak l-imbierek qattus beżgħan fuq l-ogħla fergħa tas-siġra tal-ħarrub. Bdejt tiela’ ftit ftit, waqt li s-Sinjura baqgħet tgħajjatlu qisha qed titkellem ma’ binha, nisħet is-siegħa u l-mument li aċċettajt. Ġinġer ma tħarrikx minn fejn kien. Xiż-żobb fettillek titla’ s’hemm fuq nett jekk m’għandekx bajd biex tinżel?

            “Attent mister!” widdbitni Yvette Formosa.

            “Ħalli f’idi,” serraħtilha rasha niggranfa maz-zkuk b’ċertu faċilità li lanqas jien stess ma stennejt.

            Kien irnexxieli naħtaf lill-ostru Ġinġer f’idejja meta ġraw 3 fatti li ma kontx bassart: a) il-qattus beża’ minni u biex jiddefendi ruħu girifni f’għonqi – xi ħruq marijamadonna!; b) il-fergħa ma felħitx il-piż ta’ ġismi, inqasmet bit-toqol u spiċċajt inżilt l-għoli tas-siġra – sa mnalla ma kinitx ħafna – għal ġol-ħamrija taħti; ċ) iżda agħar minn hekk il-Ġinġer spiċċa taħti u qata’ qasir il-għomor il-ħajja f’dik id-dar enormi tas-Sinjura Formosa. Ħaqqek Spettur talli ridt tagħmilha tal-hero, dalgħodu.

            Ftit tal-ħin wara, kif mill-ġdid, ġejt f’sensija sibt ruħi mimdud fuq is-sufan fis-salott qisni mort għall-gwerra bi Florence Nightingale maġenbi tnewwaħ. Il-ħruq f’għonqi u t-tbenġil ma’ ġenbi kollu biddluli l-perspettiva ta’ dak il-Ħadd wara ż-żjara għand il-Crystal Palace. Ta’ Ġinġer bla ħajja l-ebda sinjal. Mortacci tua. Ma flaħtx niċċaqlaq.

            “Int l-Ispettur Gallo hux veru?” saqsietni għall-għarrieda, bid-dmugħ nieżel ma’ ħaddejha, kif newlitli tazza ilma kiesħa. “Insegwiehom sew l-aħbarijiet,” qaltli tippuntali lejn it-televixin imwaħħal mal-ħajt. U qabdet issemmili diversi każijiet li ftakret b’dettalji impressjonanti. Każi li kont naf b’għajnejja magħluqa, ovvjament.

            Hekk tħares lejja b’dieqa u rabja fl-istess nifs, u b’xugaman f’idejha, minn moħħi għadda biss ħsieb wieħed: ma nagħmlux mod li kont iltqajt mal-Annie Wilkes tiegħi u ħa tpattili talli qtiltilha lill-maħbub Ġinġer tagħha?