Għaddew fuq tliet ġimgħat diġà
marijamadonna minn dakinhar illi nfilzajt ruħi fil-grupp. Il-laqgħat jinżammu
darbtejn fil-ġimgħa: it-Tnejn u l-Ġimgħa. Ħafna mill-grupp jattendi minn jeddu
iżda ħamsa minnhom qegħdin hemm parti minn programm obbligatorju. Ma' kull
waħda bdejt insir naf dejjem iżjed tentufiet interessanti dwar kull wieħed u
waħda. Intbaħt li kont attur tajjeb, ukoll. Kont dħalt sew fil-parti ta’
Pierre, għalliem tal-Bioloġija f’Kulleġġ post-sekondarju privat, li wara mewt
martu xtaq imur ħdejha the long way.
Ħarriftilhom dwar kif sibt ruħi quddiem il-Bord tad-Dixxiplina li ma ħallilix għażla
jekk ma ridtx nara l-bieb ta’ barra. “Jekk tassew trid issalva d-daqsxejn
reputazzjoni li fadallek,” kif taparsi amarli l-Prinċipal De Pasquale.
“Kuraġġ, ħabib,” kienet il-kelma ta’faraġ
mingħand il-ħafna.
Iżda jien ma kontx hemm fosthom biex
naqta’ x-xorb. Kont hemm għaliex wieħed minnhom ma kienx min kien qed jallega
li kien. Il-counsellor tas-Sedqa kien l-uniku wieħed konxju li kont hemm undercover. Tassew li f’kull grupp hemm
dejjem ċans issib lil xi ħadd jagħmilha ta’ dak li mhux għaliex il-mistħija
hija forza qawwija ħafna. Iżda f’dal-każ il-mistħija ma kellhiex sehem.
Wieħed minn dawn il-ħdax ma kienx onest dwar il-problema u ma kienx qiegħed
hemm ġew sabiex tassew ifieq minnha.
Għax għalkemm anke jien kont qed inqarraq bihom ukoll, il-finijiet tagħna kienu
għal kollox differenti minn xulxin.
L-impostur kien daħal jagħmel parti mill-grupp sabiex jistabbilixxi kuntatt
ma’ ex-alkoħoliku għaliex hemm barra ma setax jagħmel dan għal diversi
raġunijiet: 1) l-ex-alkoħoliku kien qed jagħmel programm, f’waħda mir-residenzi
tas-Sedqa, li matulu ftit kellu aċċess u kuntatt mad-dinja ta’ barra; 2)
il-mobiles kienu strettament ipprojbiti; 3) ma riedx jagħti wisq fl-għajn jekk
jagħmel dan b’mod daqshekk fl-apert; 4) u għaliex iżjed minn kollox il-finijiet
tal-impostur kienu kriminali.
David* - dak li jekk Tiftakru l-ewwel parti ta’ din il-bloggata għiditilkom
li waqaf jixrob għax il-mara hedditu li teħodlu kollox – kien wieħed mill-aqwa
mħuħ fil-pajjiż fejn jidħlu hold-ups ikkumplikati.
Dawk l-iktar sofistikati u li għamlu ħoss fil-pajjiż kollha kellhom, b’xi mod
jew ieħor, il-marka tiegħu.
“Iżda issa daqshekk ma’ dik il-ħajja tal-passat,” qalilna darba waqt laqgħa
minnhom.
Għaldaqstant l-impostur kellu l-ħsieb li jreġġgħu lura minn kelmtu. Skont
wieħed mill-informaturi tiegħi, il-kelma ġriet li kienet ippjanata serqa kuraġġjuża
mill-Bank Ċentrali ta’ Malta u l-moħħ warajha – għalkemm l-identità tiegħu ma
kinitx magħrufa – kien daħal jagħmel programm tas-Sedqa biex iħajjar lil David*
itih daqqa t’id.
David* kien espertissimu, u apparti hekk fis-Snin Disgħin kien diġà pprova
darba oħra (bla suċċess) jattakka l-Bank Ċentrali. Minħabba f’hekk kien
il-persuna ideali sabiex joħloq il-pjan perfett għat-twettiq tagħha:
mill-kuntatti għall-blueprints tal-Bank, eċċetra. Ħabat tajjeb li David* -
almenu mill-ħafna drabi li tkellimna ras imb ras - ma kellux idea min jien
tassew. L-impostur kellu f’idejh karta importanti: it-tentazzjoni li jaqsmu
bejniethom eluf kbar kienet ferm akbar minn dik tal-flixkun. Għax ħanżir
taqtagħlu denbu ma jsirx ħmar.
Għalhekk f’moħħi nibet pjan sempliċi kif noħorġu mill-camouflage.
Apparti David* – illum iqarreb is-sittin iżda fid-dehra taħsbu iżgħar sew –
l-erbgħa l-oħra li kienu qed jagħmlu l-programm kienu: Ġuże’* il-gay illi
fl-apert beda jqisu father figure; Bernard*,
illi bħala awtur magħluq bejn erba’ ħitan minnufih fehem li seta’ jerġa’ jikteb
bestseller ibbażat fuq ħajjet David*;
Donald* il-bankier illi kien għadu mimli għadab għal kull forma ta’
istituzzjoni finanzjarja; u Dario* id-dj li llum ħadd ma jridu iżda għadu
joħlom li għad jagħmel comeback liema
bħalu.
Fuq kull membru tal-grupp kelli file apposta mimli rekords dwar ħajjithom
tal-imgħoddi, cuttings mill-ġurnali, rekords telefoniċi qabel bdew il-programm,
osservazzjonijiet personali tal-manjieri tagħhom, kliemhom, tal-aġir waqt
il-laqgħat, konfessjonijiet veri jew foloz, eċċetra. Iżda ridt nimmanuvra b’seba’
għajnejn: ma ridtx ninkixef qabel il-waqt jew nitlef il-fiduċja ta’ xi wieħed
minnhom.
Għaldaqstant qist li kien wasal il-waqt li nħaddem il-pjan: bdejt billi b’mod
diskret xerridt il-kelma fosthom kif tas-Sedqa qed jissuspettaw illi xi ħadd
minnhom qed jikser ir-regolamenti. Min tassew irid iwettaq rijabilitazzjoni,
jaf li f’dawn l-affarijiet mhemmx nejk għax jerġa’ jsib ruħu barra. Il-counsellor
kien kompliċi iżda kellu struzzjonijiet ċari sabiex ħadd ma jieħu azzjoni qabel
il-waqt.
L-għada nirċievi telefonata mingħandu fejn skontu Dario* kien qed jaġixxi b’mod
suspettuż: fosthom illi f’kamartu nstabu karti moħbija sew f’qiegħ falz ta’
bagalja juru passaġġi sigrieti u akkwisti ta’ inġenji, fuq wieħed mill-pakketti
tas-sigaretti ta’ David* instab miktub in-numru tal-mobile tal-ex-dj kif ukoll l-email
tiegħu. Inżamm rekord ta’ dan kollu.
Qabel l-aħħar laqgħa għamilt sinjal lil Dario* jekk riedx joħroġ pejjep sigarett
miegħi. Ma qalx le. Ħriġt il-flask mill-but
tal-ġakketta u niżżilt żewġ boqqiet.
“Newwel ‘l hawn,” qalli bi tbissima ta’ min ix-xorb ma qatgħu qatt
fil-verità.
“Your secret is safe with me,” serraħtlu rasu. Dħalt warajh. Iżda mhux
qabel infurmajt lill-Kummissarju bl-iżviluppi u spjegajtlu fejn kienet qed
tinżamm il-laqgħa.
Siegħa wara kif riġment membri tad-Dipartiment tal-Investigazzjonijiet
Kriminali kaxkruh magħhom lejn id-Depot għall-ewwel interrogazzjonijiet, sibt
ruħi nitbissem. Għax għal darba x-xorb sewa tassew
għal xi ħaġa.