Blackout: it-tieni parti

“Don’t embrace the past, this life’s too good to last and I’m too young to care.”  

            Niftakarni niġri bla nifs. Bla ma nħares lura. ‘Il quddiem biss bħal żiemel tat-trott. Ġiri sfrenat ġej minn eċċitament liema bħalu aktar milli frott il-biża’ ta’ min isib ruħu f’sitwazzjonijiet bħal dawn. Niftakarni niġri bla nifs għalkemm kont ‘il bogħod minn dari u aktar minn hekk għax qatt daqs dakinhar ma ħassejtni eroj. Għalkemm snin wara kelli nitgħallem, a spejjeż tiegħi bħal dejjem, li  l-eroj issibhom biss f’rumanzi tal-ħabbagozz.

            Niftakarni niġri fid-dlam u nqis passejja bl-amment għax dik it-triq kont nafha b’għajnejja magħluqa. Dakinhar – bħal turrun drabi oħra – Malta kienet sofriet blackout. Dik id-darba, iżda, tort tal-powerstation tal-Marsa. Anke għaliex dik ta’ Delimara kienet għadha biss ħolma. Different administration, same shit.

            Blackout.

        Kollox kellu bidu ma’ Rebekah. Kollox jibda u jispiċċa ma’ nisa, ġeneralment. Żogħżiti ma kinitx eċċezzjoni. Il-paġni taż-żogħżija ma jixraq qatt li tħallihom vojta jew timliehom biss bil-monotonija.

       Elf disa’ mija sebgħa u tmenin. Daqs xahrejn u nofs wara li Malta rat bidla radikali fit-tmexxija tal-Gvern. Daqshekk Mintoff tal-bokkla biż-żiemel u Karmenu Żero. Issa t-tmun kien f’idejn Eddie, l-avukat tar-raħal skont xi ilsna ħżiena.

      Rebekah. L-unika eċċezzjoni għar-regola Gallo. Qabel Mariella, ovvjament. Sena ikbar minni u mgħarrsa ma’ wieħed mir-raħal ukoll. Marco. Fil-gang tagħna magħruf bħala Polo għax kien kiesaħ inġazzat. Wieħed minn dawk li jaħseb li hu rigal divin ta’ Alla lis-sess femminili. Ma stajtx ngħid li nafu mill-qrib. Imma di vista iva u sew għax inzerta wieħed mill-istilel tat-team tal-waterpolo tas-Sliema. U dak iż-żmien ma stajtx tissejjaħ Slimiż ta’ veru jekk ma tkunx midħla tal-pixxina u ta’ Manara, Petrococchino u l-bqija u tar-rivalità kbira ma’ dawk id-dardira tan-Neptunes. Kellu karozza tixraq bniedem inġazzat bħalu u Rebekah – li inzertat waħda mill-isbaħ tfajliet li qatt raw għajnejja fiż-żogħżija – kienet parti mill-pakkett. Kienu ilhom daqsxejn flimkien iżda kulħadd kien jaf li l-Polo xorta waħda ma setax jara dublett.

         “Dik xil-kristu qed tagħmel miegħu?” kienet il-mistoqsija parlamentari l-aktar spissa ta’ bejnietna. Iżda quddiem fatti ċari daqs il-kristall xorta kellna ħila nkunu għomja.

          Marco l-Polo żgur ma kienx xi ġuvni ddisgrazzjat. Dawk is-saffejn mibnija u x-xagħar bjond kienu jtuh palata, ja mġiddem.

        Sakemm darba waħda, wara l-ġelat u l-birra sajfija tas-soltu ħdejn ix-Chalet, jien u sejjer lura d-dar bil-mixi rajthom jitlewmu bl-ikrah. Kienet l-ewwel darba li nzertajthom mhux qishom żewġ amorini. Hi takkużah b’infedeltà u hu jgħajjarha bitch. Darba, tnejn, tlieta. Bija ma ntebħux, mistoħbi kif kont wara t-Triumph ta’ wieħed mill-ġirien t’ommi. Imbagħad rajtu jerfa’ jdejh fuqha u smajtu jgħidilha diversi xorti agħar minn bitch, għalkemm ma fhimtx kollox. Ma bqajtx nara. Tlaqt bil-ġirja, u bir-ragħwa f’ħalqi, lest għalih. Wara kollox kelli favurija l-element tas-sorpriża. Ma kellu ebda ħjiel li din il-ġlieda kont rajtha jien ukoll. Xufftejn Rebekah dehruli maqsuma u mdemmija. Taptaplu fuq dahru. Għaqqadt il-ponn u kif dar xejjirtlu daqqtejn f’wiċċu: en plein f’għajnejh ix-xellugija u bi żbrixx f’imnieħru.

          In-nejka li ntbaħt tard wisq li nqbadt fuq sieq waħda hekk kif ġgajta ta’ ħamsa minn sħabu qabżu fuqi għall-għarrieda. Ma stajtx nitħarrek mnejn kont. Ovvjament qlajt xebgħa tal-beati pawli u domt ġimgħat inġarrab il-marki tagħha.

          Imma ż-żmien ma jnessix. Almenu għalija.

        Kien l-aħħar tas-sajf, ‘kk niftakar sew, meta nqata’ d-dawl għall-għarrieda. Kienet seħħet xi ħsara kbira l-Marsa.

       “Ħaqqa t-turbina,” niftakar lil missieri jgerger. Konna kollha miġbura fis-salott  naraw xi programm medjokri fuq Xandir Malta.

          Tas-Sliema saret dalma waħda. U bħalma kien jiġri kull darba li jmur id-dawl, tas-Sliema kollha ħarġet fit-toroq. Jien tlaqt interraq it-toroq mudlama forsi ninzerta lil sħabi u ninfexxu f’ġelat mingħand tal-gabbana t’Għar id-Dud. F’sidestreet minnhom nilmaħ il-vettura tal-Polo wieqfa tleqq bħal dejjem. Ħarist madwari imma ma kienx hemm traċċa tiegħu. U wisq anqas ta’ sħabu. Mill-but tax-shorts slitt iċ-ċavetta tal-bieb ta’ barra tad-dar t’ommi. Erġajt ħarist madwari u ma dehrli li rajt lil ħadd jagħti kasi. Baxxejt u mal-bieba tax-xufier ħażżiżt ĦANŻIR b’ittri kapitali u kbar u taħthom l-inizjali tiegħi.

          Mhemmx xi ngħidu illi Rebekah u Marco ma baqgħux flimkien u wisq anqas spiċċat miegħi.

          Imbagħad tlaqt niġri bla nifs qisni żiemel tat-trott.

Blackout: l-ewwel parti.

“Don’t kid yourself and don’t fool yourself.”  

            Kif il-ġiżualla kont insejtha? Kienet qiegħda tkellimni u ma ntbaħtx.

            Għajjat. Storbju. Daħq. Swidija (sa ċertu punt) kull fejn tara.

Għax bħal f’ħafna affarijiet oħra t-trends taż-żminijiet għandhom ħabta jaslu għandna snin wara pajjiżi oħra. Bid-delay. Imbagħad jagħmlu bħat-trikkitrakki: jieħdu malajr. Xi kultant (jew ta’ spiss?) anke żżejjed.

            Għajjat. Storbju. Daħq ixxellerat. Swidija (sa ċertu punt) kull fejn jilmħu għajnejk.

            Xil-beati tridu?

         Daqs ġimgħa ilu, fl-aħħar t’Ottubru le?, seħħ il-bużillis. Kif nasal Tas-Sliema, wara ġurnata xogħol, nintebaħ li mar id-dawl. Almenu n-naħat tagħna, żgur.  Jien u miexi lura lejn il-blokka – għax bejn toroq magħluqa ħabba tiswijiet jew kisi ta’ tarmak (aboutfuckingtime!) u parkeġġ limitat spiċċajt ħallejt il-Consul għand Alla – stħajjiltni sibt ruħi f’xi xena post-apokalittika. Forsi nara wisq films.

         Dlam jagħti fl-oranġjo, karozzi ftit li xejn, nies wisq anqas ħlief tfal (jew kif kellha ħabta tgħajtilhom ommi: tfalijiet) u żgħażagħ jgħajtu “Trick or Treat?” inkella jħabbtu l-bibien immarkati għall-okkażjoni. Għal mument dik ix-xena fakkritni fl-affari ta’ Mosè u l-għaxar pjagi t’Alla qabel l-eżilju mill-Eġittu. Ġuvnott gwapp azzarda jsaqsini l-mistoqsija Halloween-jana. Ħasra li fid-dlam ma setax japprezza l-ħarsa-tweġiba tiegħi, almenu daqskemm xtaqt jien.

            Xiż-żigg jaħbat? smajtu jpespes minn taħt l-ilsien.

            L-arloġġ qalli: it-tmienja u ħamsa.

L-impressjoni ta’ Windsor Terrace stqarritli: qishom daqqu nofsillejl, ħniena t’Alla!

Mill-banda l-oħra l-mobile – b’kumbinazzjoni smajtu jdoqq  (ħaġa mhux tas-soltu) – infurmani b’messaġġ qsajjar li dil-affari tad-dawl maqtugħ ma kinitx ristretta biss għal Tas-Sliema. Blackout. Il-kelma wżata mit-Times. Bħalma ta’ spiss kelli, l-għada filgħodu, wara xarba whisky kif tmiss il-liġi.

Fit-twieqi stajt nara biss qargħa aħmar jiddi u jitbissem għalkemm iktar donnu qed jitnejjek bija talli ma kontx kapaċi nidħol fl-ispirtu.

            “Ebenezeeeeeeeeeeeeer!” smajt vuċi rqajqa tgħajjat minn warajja.

            Qabbadt Royals u kont diġà lest sabiex indur ngħidilha erba’ kelmiet kif tmiss il-liġi.

            Imma kienet biss waħda tampari ssejjaħ lill-kelb tal-but tagħha li mid-dehra sab ix-xoqqa f’moxtha u ħarbilha biċ-ċinga b’kollox. X’ħasbet? Li ħa nwaqqfu? Il-libertà l-ewwel u qabel kollox.

          Fl-indana, ħdejn il-lift bla ħajja, bdejt nhewden: l-emergency lights iċċarġjati? għad fadalli biżżejjed xemgħat biex ninqeda? Qas biss ridt naħseb fit-traġedja doppja. U fuq kollox bla elettriku xiż-żobb ħa noqgħod nagħmel? Bdilt il-mobile f’torċ – x’konna nagħmlu għoxrin sena ilu f’ċirkostanzi bħal dawn? – sabiex nevita li niekol l-irħam tat-taraġ jew li nkisser iċ-ċavetta fis-serratura: għax ħabba ż-żubbaba ta’ alkoħol ikolli nammetti illi jien re-offender fiż-żewġ każijiet.

          Kif dħalt ġewwa l-flat fittixt biddiltu f’monasteru, wieħed minn dawk ta’ Żmien il-Medju Evu, tant ix-xemgħat inemnmu tawh laqta spiritwali. Għalkemm il-burdata li kelli ma kien fiha xejn spiritwali jew reliġjuż. Sa mnalla t-temp barra kien aċċettabbli u ma fettillux huwa wkoll jitpastaż. Għalkemm skont it-tbassir fuq ir-radju – moqri f’ton li dejjem jispiċċa jfakkarni fl-eks-kunjata, alla jbiegħdek minnha – kellna lejl ta’ ragħad u maltemp ġej. Imma minn dan kollu lanqas bewla xita. Għalhekk intfajt fil-gallarija. Ferrajt diversi grokkijiet whisky – il-Bell’s ġie l-ewwel f’idejja – u qattajtha indaħħan, inlegleg u nissendika. Ma ħallitlix triq oħra, l-Enemalta.

            Kien hemm min, mixħut fil-gallarija bħali, jagħmel ħiltu bħallikieku lagħbi tal-poker sabiex ma jħallix lil min jitkixxef dwaru imma jkun jaf x’inhuma l-karti tal-oħrajn. Bħas-Sur Gauci tal-maisonette tan-naħa l-oħra li bl-iskuża tat-tipjip – għax martu ma tħallihx idaħħnilha ġewwa – jkun jaf kollox u fuq kulħadd. Kien hemm min mitruħ fuq siġġu fil-parapett, bħall-aħwa De Piro li jgħixu f’waħda mill-ftit townhouses li fadal fl-akkwati, jgħid ir-rużarju għan-nom tat-triq kollha. Kien hemm min sab ix-xoqqa f’moxtha għax id-dlam jostor dak li ma tridx turi. Bħat-tfajla tal-appartament ta’ faċċata, ma nafx x’jisimha għax kemm issellimli u kulħadd għal triqtu, li mid-dehra llejla kienet in dolce compagnia. Għax għalkemm għalqet il-blinds bilġiri xorta waħda lħaqt ilmaħt is-silhouette taż-żagħżugħ warajha.

            “Salute!” għedtilha jien u ngħolli t-tazza mimlija, imma ovvjament moħħha kien diġà banda oħra.

            Kien hemm min beda jgerger kontra l-Gvern, kien hemm min b’ton ironiku – żguralla Pierre l-gay ta’ flat numru tnejn għax leħnu tagħrfu minn seba’ mili bogħod – smajtu jgħid li allaħares isiru jafu ċ-Ċiniżi. Tbissimt għax il-memorja bagħla. Tbati mill-oġġettività. Selettiva u tagħżel liema jogħġobha. Hawnhekk bħalma fiż-Żejtun. Mhemmx konfini ġeografiċi jew differenzi ta’ klassi.

            Ħarist lejn is-silġ idur f’qiegħ it-tazza vojta. Erġajt ferrajt u xrobtha f’nifs.

Kien hemm min ...