Dazed and Confused

“Soul of a woman was created below.”  

            Il-bloggata tal-lum hija għal kollox differenti mill-oħrajn ta’ qabilha. Mhux għax “new year, new me”. Dak kollu bullshit. Imma għaliex wara l-ittra tal-imniegħel avukat, li sibt mitwija fi tnejn fil-letterbox ilbieraħ wara ġurnata xogħol tal-ħara, ma stajtx inħallieha lixxa. L-ebda alla ma joħroġni ta’ kodard, ta’ xi ħadd li jibża’ minn dellu.  Għalhekk l-ewwel ħsieb kif rajt isem l-imniegħel avukat kien: xiż-żobb inqalgħalha issa?

            Wara kollox l-aħħar jiem kienu kollha blurry tort ta’ sieħbi Johnnie Walker.

Ftaħtha biss wara li niżżilt żewġ grokkijiet f’nifs u poġġejt bilqiegħda nidgħi. Żewġ karti mehmużin. Fuq quddiem nota qasira tal-avukat Cocker b’Malti mħanżer aktar minn dak li sirt tisma’ fuq it-televixin. Infurmani li wara l-bloggata tiegħi tat-Tlieta 30 ta’ Diċembru, imsejħa “Madness”, Mariella Gallo, sive’ Muscat, ħasset li kellha dritt għal right of reply. Dan  sabiex tikkoreġi ċertu fatti esposti minni, bħala eks-żewġha, fid-dawl tal-fatt li fl-opinjoni tagħha naqqsulha mill-ġieħ. Anzi ma nafx kif ma żiedx ukoll mala-fucking-famanti mat-tilja frażijiet bombastiċi li għandhom ħabta jiddilettaw bihom l-avukati tal-ħabbagozz. Għaldaqstant kompla jinfurmani li anness, blah blah blah,  kelli nsib ittra mill-għażiża xi-darba-kienet-sinjura tiegħi bit-tweġiba tagħha għall-fatti esposti fl-istorja.

Wara diversi grokkijiet oħra qtajtha illi nilqa’ l-isfida bħal dak il-cowboy, tal-westerns ta’ dari, ferut fl-unur. Wara kollox nagħmel x’nagħmel xorta kont ħa nibqa’, skontha, annimal astratt jew muntun tas-siġar.

Għalhekk qed inġib, verbatim, it-tweġiba tagħha mingħajr ma missejt kelma (avolja subgħajja bdew jikluni biex fil-parenteżi nħalli xi kumment). Imma għal darba moħħi rebaħ lil qalbi fejn tidħol Mariella.

“Għażiż Victor,

Nixtieq l-ewwelnett inroddlok ħajr talli wara dawn is-snin kollha għadek, b’xi mod jew ieħor, taħseb fija jew issemmini, anke jekk naf li fil-batal, ħafna mid-drabi. Qed ngħidielek mill-qalb. Sinjal li ħallejt impatt fuqek, anke jekk l-ebusija ta’ rasek (għidli!) tħallik tara biss ix-xaqliba n-negattiva.

Ma kelli l-ebda idea li fettillek tibda blog. U meta waħda minn ħbiebi semmietili ngħidlek id-dritt għall-ewwel bdejt nidħaq. “Victor jikteb blog? Mela dak għandu paċenzja? Dak għax-xogħol, għall-whisky u s-sigaretti jgħix.” M’emminthiex. Imbagħad it-Tlieta li għadda ċemplitli biex tinfurmani bl-istorja li fettillek ittella’. Għala tħobb taqla’ daqshekk l-imgħoddi għid? Int stess kont tgħid li l-passat mażżra. Forsi qabel kollox xtaqt tikkonvinċi lilek innifsek li f’dik l-epoka konna għadna taparsi flimkien?

Bagħtitili fuq Facebook u qrajtha minnufih ħa nara biex ħriġt. Ma kontx sorpriża. Ħsibtni daqshekk belha li ma ntbaħtx li kien jaqagħlek għaliha lis-Sinjura ****** (imħassar għal raġunijiet ta’ privatezza) jew li mal-ewwel ċans mintix ħa tbill subgħajk? Mela min jitwieled tond ħa jmut kwadru xi darba? Saħansitra rnexxielek tkun maledukat ma’ min kien iħares lejk b’ċertu ammirazzjoni u li talab biss ftit minn ħinek.

Miniex ħa nieħu ħafna fit-tul imma xtaqt ngħidlek li jekk bil-bloggata tiegħek mingħalik li waqqagħjtni għaż-żufjett, xtaqt ninfurmak ukoll għażiż Victor, li dakinhar, filwaqt li int kont qiegħed titliegħeb għas-Sinjura in kwistjoni fil-loki jien ukoll għamilt bħalek ma’ wieħed mill-mistednin li kien ferm aktar dħuli miegħi milli qatt kont int f’dawk is-snin kollha miżżewġin. U kieku kelli ċ-ċans kont nagħti l-wiċċ lil ħaddieħor ukoll, imma ma nzertajtx ħanżira daqsek.  Issa jekk trid, ħaddem moħħok biex tara min minnhom kien.

Tislijiet

Mariella

Ps: Jekk int buli u għandek il-bajd li dejjem tiftaħar bihom ippubblikaha din l-ittra.”

Qattajt lejl sħiħ inħares lejn l-aħħar żewġ sentenzi.